बागलुङ, १८ असार । गण्डकी प्रदेश स्तरीय व्याडमिन्टन प्रतियोगिता भोलीदेखि सुरु हुने भएको छ ।
प्रदेश खेलकुद परिषद गण्डकीको आयोजना र जिल्ला खेलकुद विकास समिति बागलुङको व्यवस्थापनमा भोली (बुधबार)देखि बागलुङमा प्रदेश स्तरीय महिला/पुरुष व्याडमिन्टन प्रतियोगिता हुने भएको हो ।
जिल्ला खेलकुद विकास समिति बागलुङले मंगलबार पत्रकार सम्मेलन गरी प्रतियोगिताको तयारी पुरा भएको जनाएको छ । पत्रकार सम्मेलनमा बोल्दै जिल्ला खेलकुद विकास समितिका अध्यक्ष कुमार खड्काले प्रतियोगितामा गण्डकी प्रदेशका ९ जिल्लाले सहभागीता जनाउने बताउनुभयो । उहाँले कास्कीबाट ४ पुरुष र २ महिला तथा बागलुङ, म्याग्दी, पर्वत, मुस्ताङ, स्याङ्जा, मनाङ, लमजुङ, तनहुँ, गोरखा र नवलपुरबाट समान ३ पुरुष र २ महिला खेलाडीहरुले प्रतियोगितामा सहभागिता जनाउने बताउनुभयो ।
प्रतियोगिताबाट आगामी मंसिर महिनामा कर्णाली प्रदेशमा हुने दशौं राष्ट्रिय खेलकुद प्रतियोगितामा प्रदेशबाट सहभागिता जनाउने ७ पुरुष र ५ महिला खेलाडी छनौट गरिने छ । व्याडमिन्टनमा ५ इभेन्टको प्रतिस्पर्धा हुनेभएपनि प्रतियोगितामा महिला र पुरुष सिङ्गल इभेन्टका मात्र खेल हुने बागलुङ व्याडमिन्टन संघका अध्यक्ष राजिन खड्काले बताए ।
जिल्ला खेलकुद विकास समिति बागलुङका अध्यक्ष खड्काले प्रतियोगितामा ६ स्वर्ण, ६ रजत र १२ काश्य पदकको लागि प्रतिस्पर्धा हुने बताउनुभयो । प्रतियोगिता बिहिबारसम्म संचालन हुनेछ ।
