बागलुङ, २३ पुष । बागलुङमा प्रहरीले लागुऔषध सहित एक युवालाई पक्राउ गरेको छ ।
बागलुङको गलकोट नगरपालिका–५ घरभई बागलुङ नगरपालिका–२ टेलिकम चोकमा बस्दै आएका २२ बर्षिय गौतम बस्नतेलाई सोमबार दिउँसो लागुऔषध सहित पक्राउ गरिएको जिल्ला प्रहरी कार्यालय बागलुङले जनाएको छ । बस्नेतले कोठाबाटै लागुऔषध (डाईजेपाम) को कारोबार गरिरहेका भन्ने गोप्य सूचनाको आधारमा खानतलासी गर्दा ५४ एम्पुल लागुऔषध बरामद गरिएको जिप्रका बागलुङका प्रहरी नायव उपरीक्षक (डिएसपि) मदन केसीले बताए ।
डिएसपि केसीले बस्नेतको कोठामा निलो रंगको टिसर्टमा बेरी राखेको अवस्थामा डायजेपाम इन्जेक्सन आईपी १८ एम्पुल, बुप्रेनोर्फिन इंजेक्शन आईपी १८ एम्पुल र प्रोमेथालिन हाइड्रोक्लोराइड इंजेक्शन आईपी १८ एम्पुल लागुऔषध फेला पारिएको बताए ।
पक्राउ परेका बस्नेतलाई सोमवार बागलुङ जिल्ला अदालतबाट म्याद थप गरी थप अनुसन्धान गरिरहेको डिएसपि केसीले बताए ।
