
बागलुङ, १९ पुष । बागलुङमा जारी गण्डकी प्रदेश खुला पालिका स्तरीय पुरुष भलिबल प्रतियोगिताको उपाधिका लागि बागलुङको गलकोट नगरपालिका र ताराखोला गाउँपालिका भिड्ने भएका छन् ।
सातौं बागलुङ महोत्सवमा आयोजना गरिएको प्रतियोगिताको पहिलो सेमिफाइनल खेलमा बिहीबार होटल माउन्टेन भ्यू काठेखोला गाउँपालिका-५ माथि रोमाञ्चक जित निकाल्दै ताराखोला फाइनलमा प्रवेश गरेको हो । ताराखोलाले होटल माउन्टेन भ्यूलाई ३-२ प्रतिस्पर्धात्मक सेटमा पराजित गर्यो ।
पहिलो सेटमा २५-२१ को जित निकाल्न सफल ताराखोलाले दोस्रो सेट २०-२५ ले गुमाउन पुग्यो । तेस्रो सेट २५-१७ को सहज जित निकालेको ताराखोलाले चौथो सेटमा प्रतिस्पर्धात्मक २९-३१ ले गुमाउँदा खेल पाचौं सेटमा पुगेको थियो ।
पाँचौं सेटमा सुरुवातदेखि उत्कृष्ट खेल प्रस्तुत गरेको ताराखोलाले १५-१० को जित निकाल्दै फाइनलमा स्थान पक्का गर्यो । यस्तै दोस्रो सेमिफाइनल खेलमा गलकोट नगरपालिकाले ढोरपाटन नगरपालिका माथि ३-२ को प्रतिस्पर्धात्मक सेटमा जित निकाल्दै फाइनल प्रवेश गरेको छ ।
पहिलो सेट २३-२५ ले गुमाएको गलकोटले दोस्रो सेटमा २५-१९ र तेस्रो सेटमा २५-२० ले जित निकाल्न सफल भयो । चौथो सेटमा गलकोटले १५-२५ ले गुमाउन पुग्दा खेल पाँचौं सेटमा पुगेको थियो । गलकोटले पाँचौं सेटमा १५-१२ को जित निकाल्यो ।
प्रतियोगिता अन्तरगत शुक्रबार तेस्रो स्थानका लागि ढोरपाटन नगरपालिका र होटल माउन्टेन भ्यूबीच खेल हुने महोत्सवका भलिबल खेल संयोजक संजयकुमार श्रेष्ठले जानकारी दिए । उनले फाइलन खेल शनिबार हुने बताए ।
प्रतियोगिताको विजेताले १ लाख ५१ हजार १ सय ११ रुपैयाँ, उपविजेताले १ लाख १ हजार १ सय ११ रुपैयाँ, तृतीय हुने टिमले ५१ हजार १ सय ११ रुपैयाँ र सान्त्वना हुने टिमले २५ हजार १ सय ११ रुपैयाँ प्राप्त गर्ने भलिबल खेल संयोजक श्रेष्ठले बताए ।









