बागलुङमा चैत्राष्टमी कप फुटबल हुने

बागलुङ, ५ चैत
चैत्राष्टमी–२०७३ मा यस वर्र्ष फुटबल प्रतियोगिता पनि समावेश गरिने भएको छ ।
जिल्लामा युवाहरुको फुटबल खेल प्रतिको आकर्षणलाई ध्यानमा राखेर चैत्राष्टकी मेला ब्यवस्थापन समितिले अन्तर कलेज स्तरीय चैत्राष्टमी कप फुटबल प्रतियोगिता संचालन गर्न लागेको हो ।
धौलागिरी अंचल भित्रका उच्च मा.वि तथा क्याम्पसहरुले उक्त प्रतियोगितामा समावेश हुन पाउने छन । प्रतियोगितामा विजेतालाई नगद ४० हजार, र उपविजेतालाई नगद २० हजार सहित ट्फी, पदक र प्रमाण पत्र प्रदान गरिने छ ।
साथै उत्कृष्ठ खेल प्रदर्शन गर्ने विविध ८ विधाका खेलाडीहरुलाई समेत पुरस्कृत गरिने बताइएको छ । चैते दशैको पहिलो दिन चैत्र १६ गते बाड्डेचौर मैदानमा प्रतियोगिता प्रारम्भ हुने छ । प्रतियोगिता १८ गतेसम्म चल्ने छ ।
चैत्राष्टमी मेला कला र क्षमता प्रदर्शन गर्ने उपयुक्त अवसर भएकाले कलाकारहरुका साथै खेलाडीहरुलाई पनि प्रोत्साहन गर्न फुटबल प्रतियोगिता समाबेश गरिएको मेलाका मुल संयोजक राजु खड्काले बताउनुभयो । मेलामा फुटबल ब्यवस्थापनका लागी फ्यूचर स्पोर्टस र बागलुङ खेलकुद क्लबसंग सहकार्य गरिएको र आगामी बर्ष देखि संस्थागत रुपमा प्रतियोगिता संचालन गर्ने तयारी भै रहेको खड्काले बताउनुभयो ।
प्रतियोगिता संचालनका लागी कूल ५ लाख १५ हजार रुपैयां खर्च हुने फयूचर स्पोर्टस क्लबका संयोजक फणिन्द्र खड्काले बताउनुभयो । प्रतियोगितामा अन्चल भित्रका करिब १२–१५ टिमको सहभागीता रहने छ । प्रतियोगितामा सहभागि हुन चाहने कलेजले चैत्र १५ गतेसम्म खेलाडीहरुको नामावली सहित टिम दर्ता गरिसक्नु पर्ने बागलुङ फुटबल क्लबका अध्यक्ष प्रकाश शर्माले जानकारी दिनुभयो ।