सिर्जना कार्की
बागलुङ, २८ भदौ
अमर आदर्श आवासिय उच्च माध्यमिक विद्यालयले आयोजना गरेको अन्तर उच्च मावि स्तरिय फुटबलको उपाधि फ्युचर ब्राईटर उच्च माविले जितेको छ ।
उत्कृष्ट जिवनको लागि खेलकुद भन्ने नाराका साथ आयोजना गरेको अमर आदर्श ट्रफि–२०७३ को फाइनल खेलमा अमर आदर्श उच्च माविलाई ० विरुद्ध २ गोल अन्तरले पराजित गर्दै फ्युचरले उपाधि चुमेको हो ।
खेलको निर्धारित समयमा दुवै टोली गोल रहित बराबरीमा रोकिएपछि खेल अतिरिक्त समयमा धकेलिएको थियो ।
अतिरिक्त समयको पहिलो हाफ गोलरहित बराबरीमा सकिएपछि धेरैले खेल ट्राइब्रेकरमा जाने अनुमान लगाएका थिए ।
अतिरिक्त समयको दोस्रो हाफको अन्त्यतिर लगातार दुई गोल गर्दै फ्युचरले धेरैको अनुमानलाई गलत सावि गरिदिएको थियो ।
अतिरिक्त समयको अन्त्य तिर निकै आक्रमक खेल प्रस्तुत गरेको फ्युचरको लागि पहिलो गोल इन्सान थापाले गरेका थिए ।
१ गोल खाएपछि केहि हतास बनेका अमरका खेलाडीहरुको फाइदा उठाउँदै फ्युचरले खेलको अन्तिम समयमा गोल गर्दै २ गोलको अग्रता लिएको थियो । फ्युचरका सन्दिप विकले सवै खेलाडी विट भइसकेको अवस्थामा गोलरक्षकलाई छक्याउँदै गोल गरेका थिए ।
खेलको पहिलो हाफमा अमर आदर्श निकै हावि भएपनि दोस्रो हाफमा फ्युचर खेलमा फर्किदा खेल निकै रोमाञ्चक बनेको थियो ।
खेल अवधिभर दुवै टोलिबाट निकै राम्रो गोलका प्रयास भएपनि गोल हुन सकेको थिएन ।
उपाधि जितेको फ्युचरले १२ हजार नगद, ट्रफी, मेडल र प्रमाणपत्र प्राप्त ग¥यो भने उपविजेतामा चित्ता बुझाएको अमर आदर्शले ६ हजार नगद सहित ट्रफी, मेडल र प्रमाणपत्र प्राप्त गरेको छ ।
यस्तै उत्कृष्ट खेलाडीको उपाधि अमर आदर्शका कप्तान निसान थापाले प्राप्त गरेका छन् । उच्च गोलकर्ता फ्युचरका कप्तान आशिष केसी, उत्कृष्ट किपर भीमसेन उमाविका पर्वत भण्डारी, उत्कृष्ट मिडफिल्डर अमर आदर्शका श्याम घर्ति मगर र उत्कृष्ट डिफेन्डर अमरका कप्तान निसान थापा घोषित भएका छन् । उनिहरुलाई विशेष पुरस्कार वितरण गरिएको थियो ।
