बागलुङ, २१ कार्तिक । रुकुम पूर्वबाट काठमाडौं जाँदै गरेको बस बागलुङको निसीखोला गाउँपालिका–६ जाउलेपानीमा दुर्घटना भएको छ ।
ना ८ ख ८४१४ नम्बरको रात्री बस बुधबार दिउँसो मध्यपहाडी लोकमार्गमा दुर्घटना हुँदा २१ जना घाईते भएको जिल्ला प्रहरी कार्यालय बागलुङले जनाएको छ ।
जिल्ला प्रहरी कार्यालय बागलुङका सूचना अधिकारी प्रहरी नायव उपरीक्षक विजय यादवले प्रहरी घटनास्थलमा पुगेर उद्धार गरिरहेको बताए । उनले बसमा ४५ जना सवार रहेको जानकारी दिए । घाईतेहरुको उपचारको लागि प्राथमिक स्वास्थ्य केन्द्र बुर्तिबाङ पठाईएको र नामावली खुल्न बाँकी रहेको डिएसपि यादवले बताए ।
