कम अंक ल्याएको भन्दै शिक्षिकाले ब्लेडले चिरिदिइन ३४ जना विद्यार्थीको हात

काठमाडौं, २५ फागुन
राजधानीमा नै एक विद्यालयकी शिक्षिकाले आफ्ना ३४ जना विद्यार्थीलाई कक्षा परीक्षामा कम अंक ल्याएको भन्दै ब्लेडले हात चिरिदिएकी छन् ।
जडिबुटीस्थित जागृति एकेडेमीकी शिक्षिका सीतालक्ष्मी कर्माचार्यले कक्षा ६ मा अध्ययनरत २५ जना र कक्षा ७ मा अध्ययनरत ९ जना गरी ३४ विद्यार्थीको हात बेन्चमा उभ्याएर ब्लेडले चिर्न लगाएकी हुन् ।
शिक्षिका कर्माचार्यले करिब एक साताअघि विद्यार्थीलाई परीक्षा लिएकी थिइन् । सोही बखत नै उनले कम अंक ल्याउने विद्यार्थीले आफ्नो हात आफैंले ब्लेडले चिर्नुपर्ने नभए आफैंले चिरिदिने धम्की दिएकी थिइन् ।
विगत १२ वर्षदेखि उनले सोही स्कुलमा सामाजिक विज्ञान विषय पढाउँदै आइरहेकी थिइन् । प्रहरीले विद्यार्थीको हात चिर्न लगाउने शिक्षिकालाई पक्राउ गरिसकेको छ ।
महानगरीय प्रहरी परिसर काठमाडौंका प्रमुख उत्तमराज सुवेदीले शिक्षिका कर्माचार्यलाई प्रहरीले नियन्त्रणमा लिएको जानकारी दिए ।
प्रहरी नियन्त्रणमा परेपछि शिक्षिका कर्माचार्यले आफूले विद्यार्थीहरूलाई परीक्षा लिँदा नै कम अंक ल्याए हात चिर्ने धम्की दिएको स्वीकार गरेकी छन् । परीक्षाको फुल माक्स २० र पास माक्र्स आठ र निर्धारण गरिएको थियो । सबैभन्दा कम नम्बर ल्याउने विद्यार्थीको हात बढी काटिएको छ । उनीहरूको हातमा १५ देखि २० पटक ब्लेडले चिरिएको छ ।
‘परीक्षामा राम्रो नम्बर नल्याएका विद्याथीहरूलाई गत बिहीबार कक्षाकोठाको बेन्चमा उभ्याएर सिसाकलम तिखार्ने ब्लेडले हाफ्नो हात आफैं चिर्न लगाएको प्रारम्भिक अनुसन्धानले देखाउँछ,’ प्रहरीले भनेको छ ।
आफ्नो हात आफैंले नचिर्नेको आफैंले चिरिदिने भन्दै विद्यार्थीहरुलाई शिक्षिकाले धम्क्याएको प्रहरी बताउँछ । बानेश्वर बृत्तबाट खटिएको प्रहरी टोलीले उनलाई शनिबार बिहान पक्राउ गरेको हो ।
उनीमाथि जिल्ला प्रशासन कार्यालय काठमाडौंबाट आइतबार म्याद थप गरेर अनुसन्धान अघि बढाइने परिसर काठमाडौंका प्रमुख सुवेदीले जानकारी दिए । पक्राउ परेकी शिक्षिकामाथि अभद्र व्यवहार तथा अमानवीय यातनाको कसुरमा कारबाही गर्ने प्रहरी तयारी छ । प्रहरीले त्यसअघि सबै विद्यार्थी र अविभावकलाई भेट्नेसमेत जनाएको छ ।
विद्यालयले भने भक्तपुर घर भएकी शिक्षिका कर्माचार्यलाई अवकाश दिएको छ । अभिभावकहरूको गुनासोपछि विद्यालय व्यवस्थापन समितिको बैठकले उनलाई अवकाश दिएको विद्यालयका प्रिन्सिपल राजनकुमार श्रेष्ठले जानकारी दिए ।
विद्यार्थीलाई शारीरिक दण्ड दिने कार्यलाई निरुत्साहित गर्ने र शिक्षकबाट दण्डरहित शिक्षणलाई सम्मान गर्दै शिक्षिका कर्माचार्यलाई अवकाश दिएको अवकाशपत्रमा उल्लेख छ ।

आजको राजधानी दैनिकबाट

एक जवाफ छोड्न

Please enter your comment!
Please enter your name here