बागलुङ बजारको एक घरमा पसेको चितुवा वन कार्यालयको नियन्त्रणमा

बागलुङ, ४ माघ । बागलुङ जिल्लाको सदरमुकाम बागलुङ बजारमा मानव वस्तीमा पसेको चितुवालाई नियन्त्रणमा लिइएको छ ।

बुधबार विहान बगलुङ नगरपालिका–३ नागरोडका रामु खड्काको घरमा पसेको चितुवालाई डिभिजन वन कार्यालय बागलुङ र प्रहरीको टोलीले नियन्त्रणमा लिइएको हो ।

खड्का परिवारले चितुवालाई घरभित्रै पसेको देखेपछि प्रहरीलाई खवर गरेका थिए । प्रहरी र डिभिजन बन कार्यालयको टोली उक्त घरमा पुग्दा चितुवा घरको एक कुनामा लुकेर बसेको अबस्थामा भेटिएको डिभिजन बन अधिकृत मुकुन्द अधिकारीले बताए । ‘बुधबार विहान ९ः३० बजे घरभित्र चितुवा पसेको देखेपछि रामु खड्काले प्रहरीमा खबर गर्नुभएको थियो,’ अधिकृत अधिकारीले भने,‘प्रहरीले हामीलाई खबर गरेपछि त्यहाँ पुग्दा चितुवा घरको एक कुनामा लुकेर बसेको थियो ।’

अधिकृत अधिकारीले चितुवा घरभित्र पसेपनि कसैलाई आक्रमण नगरेको बताए । उनले विहान उज्यालो भएपछि जंगलबाट गाउँ पसेको चितुवाले सुरक्षित बासस्थानको खोजिमा घरमा पसेको अनुमान गरिएको बताए ।

चितुवालाई डिभिजन वन कार्यालयसँग रहेको सामान्य काठको खोरमा राखेर सुरक्षित तरिकाले घरबाहिर निकालिएको अधिकारीले बताए । उनले नियन्त्रणमा लिइएको चितुवा वन कार्यालयको परिसरमा राखिएको र बुधबार साँझ जंगलमा लगेर छोडिने बताए ।

एक जवाफ छोड्न

Please enter your comment!
Please enter your name here