बागलुङ, १७ फागुन । जिल्ला प्रहरी कार्यालय बागलुङले दुई दिनमा लागुऔषध सहित दुई युवालाई पक्राउ गरेको छ । प्रहरीले शनिवार र आईतवार बागलुङ बजारबाट लागुऔषध सहित दुई युवालाई पक्राउ गरेको जनाएको हो ।
जिल्ला प्रहरी कार्यालय बागलुङका सूचना अधिकारी प्रहरी निरीक्षक विजय भण्डारीले शनिबार बागलुङ नगरपालिका–४ का २२ बर्षिय अभिनाश बोहोरालाई फेनारगन २७, डाईजेपाम २७ र नुरफिन २७ एम्पुल गरी एकमुष्ट ८१ एम्पुल लागुऔषध डाईजेपाम सहित पक्राउ गरिएको बताउनुभयो । उहाँले बोहोरा बस्ने घरकोठामा तलासी गर्दा उक्त लागुऔषध बरामद गरेको बताउनुभयो । उहाँले बोहोरालाई जिल्ला अदालतबाट म्याद थप गरी हिरासतमा राखि अनुसन्धान भइरहेको बताउनुभयो ।
यस्तै आईतबार प्रहरीले बानपा–९ तित्याङ घरभइ वडा नं. १ रामरेखामा बस्दै आएका २२ बर्षिय रोशन थापालाई लागुऔषध सहित पक्राउ गरेको छ । प्रहरीले थापाको कोठा तलासी गर्ने क्रममा फेनारगन १४ एम्पुल, डाईजेपाम १४ एम्पुल र नुरफिन १३ एम्पुल गरी एकमुष्ट ४१ एम्पुल लागुऔषध डाईजेपाम सहित पक्राउ गरेको प्रनि भण्डारीले बताउनुभयो ।
प्रनि भण्डारीले लागुऔषध सहित पक्राउ परेका थापालाई जिल्ला अदालतबाट म्याद थप हिरासतमा राखेर अनुसन्धान अगाडी बढाईएको बताउनुभयो ।
