काठमाडाैं, ८ असोज । पाल्पाको रम्भा गाउँपालिकामा लगातारको वर्षापछि गएको पहिरोमा ३ घर पुरिएको छ । बिहान गएको पहिरोमा परि ३ घर पुरिँदा १ जना गर्भवती महिलासहित ६ जना बेपत्ता भएको गाउँपालिकाका अध्यक्ष विष्णु प्रसाद भण्डारीले जानकारी दिए ।
रम्भा गाउँपालिका वडा नम्बर २ को फोक्सिङकोटस्थित घर माथिबाट खसेको पहिरोमा परेर ३ घर पुरिएको उनले बताए ।
गाउँपालिका अध्यक्ष भण्डारीले लोकान्तरलाई भने, ‘हामी पैदलमार्ग हुँदै घटनास्थलतर्फ जाँदै छौं, हिंडेको डेढ घन्टा हुनै लाग्यो, अझै १ घन्टा लाग्छ ।’
घटनास्थलमा पुग्नका लागि सडकमा पहिरो जाँदा ढिलाई भइरहेको जिल्ला प्रहरी कार्यालय पाल्पाका डीएसपी मदन गिरीले लोकान्तरलाई बताए ।
उद्दारका लागि प्रहरीको टोली गएको भएपनि बाटोमा पहिरो गएकाले बीचबीचमा अवरोध भएको उनले बताए ।
उनले भने, ‘पहिरो पन्छाउँदै टोली अगाडि बढिरहेको छ, घटनास्थल पुग्न केही समय लाग्छ ।’
