
काठमाडौं, १७ मंसिर । नेपाली राष्ट्रिय क्रिकेट टोलीका लेग स्पिनर सन्दीप लामिछाने कोरोना (कोभिड१९) लाई जितेका छन् ।
सन्दीपले सामाजिक सञ्जाल मार्फत आफू कोरोना मुक्त भएको जनाएका छन् । सन्दीप गत आइतबार स्वासप्रस्वासमा समस्या देखिएपछि काठमाडौंमा रहेको ह्याम्स अस्पताल भर्ना भएका थिए । सन्दीपले १० दिनको आइसोलेसन बसाईपछि कोरोनालाई जितेका हुन् । सन्दीपले सबैलाई धन्यावाद दिएका छन् ।
शनिबार सन्दीपलाई कोरोना संक्रमण पुष्टि भएको थियो । राष्ट्रिय क्रिकेट टोलीको बन्द प्रशिक्षणमा सामेल हुनुअघि गरिएको पिसिआर परिक्षणमा सन्दीपको पिसिआर रिपोर्ट पोजेटिभ आएको थियो । सन्दीप राष्ट्रिय क्रिकेट टोलीको बन्द प्रशिक्षण हुँदै बिग ब्यास लिग खेल्न डिसेम्बर दोस्रो साता अष्ट्रेलिया जाने तयारीमा थिए । सन्दीप अब बिग ब्यास लिग खेल्न अष्ट्रेलिया जाने छन् । यस अघिका दुई सिजन मेलबर्न स्टार्सबाट खेलेका सन्दीपले यस पटक भने होबार्ट हुरिकेन्सबाट खेल्ने छन् ।
सन्दीप इन्डियन प्रिमियर लिग (आइपिएल) २०२० मा दिल्ली क्यापिटल्समा रहँदै संयुक्त अरव इमिरेट्स (यूएई) बाट कात्तिक २७ मा नेपाल फर्किएका थिए । सन्दीप तीन महिना पछि नेपाल फर्किएका थिए । गत साउन १५ मा नेपालबाट क्यारेबियन प्रिमियर लिग (सिपिएल) खेल्न वेस्टइन्डिज गएका थिए । जमैका तलावाजबाट सिपिएल खेलेका सन्दीपले १० खेलमा १२ विकेट लिएका थिए ।
सन्दीप सिपिएल खेलेर भदौ २९ मा संयुक्त अरब एमिरेट्स (यूएई) आइपिएल खेल्न पुगेका थिए । आइपिएलमा दिल्ली फाइनल सम्म पुगेपनि सन्दीप पुरै खेलमा बेन्चमा बसेर फर्किएका थिए ।
Soc: hamrokhelkud










