
काठमाडाैं, ३ बैशाख ।
लामो समयमसम्म देशभर बन्दाबन्दी (लकडाउन) भइरहेका बेला यसको ठूलो असर तरकारी उत्पादक किसानलाई परेको छ ।
बेमौसमी तरकारी उत्पादन गरेर आम्दानी गर्ने समयमा बन्दाबन्दीले किसानलाई प्रत्यक्ष प्रभाव पारेको छ ।
स्थानीय उत्पादनको उपयुक्त समय भए पनि बजारसम्म तरकारी नपुग्दा उत्पादक किसान लगानी डुब्ने र फलेको सामग्री कसरी व्यवस्थापन गर्ने भन्ने चिन्तामा परेका छन् ।
बजारसम्म तरकारी लैजान नसक्दा बारीमा कुहिने अवस्था रहेको किसान बताउँछन् । तरकारीको माग राम्रै भए पनि बजार हुँदै उपभोक्तामाझ पुग्न नसक्दा यो अवस्था आएको हो । स्थानीय प्रशासनले तरकारी ढुवानी र वितरणमा कडाइ गर्दा आफ्नो तरकारी खेर गएको किसानको गुनासो छ ।
भरतपुर महानगरपालिका शुक्रनगरका किसान छविलाल न्यौपाने भन्छन्, ‘बारीमा फलेको तरकारी कसरी बिक्री गर्ने भन्ने चिन्ताले निन्द्रा लाग्दैन । यही समयमा गत वर्ष बेचेर भ्याइनभ्याई थियो । सामान्य अवस्थामा बारीबाटै एक सय रुपैयाँमा बिक्री हुने बोडी अहिले २० मा लैजान मुस्किल भएको छ ।’ उनले तनेबोडी, घिरौला, लौका, फर्सी लगाएका छन् । बोडी, लौका र घिरौला बिक्री भए पनि फर्सी बिक्री नहुँदा बारीमा नै सडेर गएको गुनासो गरे । ‘तरकारी बिक्री गर्ने गाडीलाई सहज जान दिने, बजारमा बिक्री खरिद गर्न दिने व्यवस्था नगरे हामी किसान ऋणमा डुबेर जाने छौँ’ उनले आफ्नो पीडा सुनाए ।
उपभोक्ताले खान नपाउने, किसानको बारीमा तरकारी सड्ने अवस्था छ । सुरक्षित तरिकाले किसानले उत्पादन गरेको सामग्री बिक्री गर्न दिने व्यवस्था प्रशासनले गर्नुपर्ने उनको भनाइ छ ।
भरतपुर महानगरपालिका–२६, खत्रौलीका किसान दीपक तिमिल्सिना आफ्नो बारीमा भएको तरकारी बिक्री नहुँदा चिन्ता थपिएको बताउँछन् । ‘स्थानीय बजारमा कम खपत हुन्छ, बजार लैजान पाएको छैन’ उनले भने ।
तिमिल्सिनाले ११ बिघामा तरकारी लगाएका छन् । अहिले उनको बारीमा गोलभेँडा, बोडी, घिउ सिमी बिक्रीका लागि तयारी अवस्थामा छन् । लकडाउनअघि तरकारीको सहज आपूर्ति भए पनि अहिले तरकारी बिक्री ठप्पजस्तै भएको उनले बताए ।
तरकारी खेतीका लागि पकेट क्षेत्र मानिएको पश्चिम चितवनमा ढुवानी सहज नहुंँदा र उपभोक्ताको घरमा सहजै पुग्न नसक्दा किसानको उत्पादन खेर गएको हो । भरतपुर महानगरपालिका २५ का अर्का किसान अनुप सुवेदीले १५ बिघामा तरकारी लगाएका छन् तर बजारसम्म पुर्याउन नपाउंँदा समस्या भएको उहाँ बताउँछन् ।
स्थानीय उत्पादनका लागि ढुवानी सहज नभए पनि दैनिक दर्जनौँ ट्रक तरकारी भारतबाट आइरहेका छन् । स्थानीय उत्पादनले बजार नपाउँदा सरकारले भारतीय तरकारी गाडीलाई रोक लगाउनुपर्ने किसानको भनाई छ ।
महानगर तरकारी तथा फलफूल बजार नारायणगढका निर्देशक थीरप्रसाद धिताल तरकारीको माग उच्च भए पनि बजारै बन्द हुँदा किसानले थप घाटा बेहोर्नुपरेको बताउँछन् । चैत १८ गतेसम्म त तरकारी बजार खुलाएका थियौँ, उहाँले भन्नुभयो, भीड बढी भएका कारण पूर्ण रूपमा प्रशासनले बन्द गरिदियो ।
तरकारी आपूर्ति र वितरण उच्च सावधानीका साथ सुचारु गर्नुपर्ने धितालले बताए । यहाँको तरकारी तथा फलफूल बजारबाट काठमाडौं, बुटवल, पोखरा, तनहुँलगायत जिल्लामा आपूर्ति हुने गरेको छ । यहाँ स्थानीय तरकारी दैनिक ७५ टन, बाह्य जिल्लाबाट ५० टन र भारतबाट ७५ टन बराबरको आपूर्ति हुने गरेको धितालको भनाइ छ ।
आजको गोरखापत्र दैनिकबाट










