लक्ष्मण सापकोटा
पर्वत २५ भदौ
पर्वतको धाइरिङ्ग गाविस वडा नं. ३ किराखोरमा शनिवार दिउँसो जीप दुर्घटना हुँदा ३ जनाको मृत्यु भएको छ ।
पर्वतकै शालिजा गाविसको ठोट्नेरीबाट धाईीरङ्ग गाविस स्थित मिलनचोक आउँदै गरेको ग १ ज ५१०२ नंम्बरको जीप दुर्घटना हुँदा म्याग्दी जिल्ला ज्यामरुकोट गाविस वडा नं.३ घर भएकी ५० वर्षिया राममाया दमाईको घटनास्थलमै मृत्यू भएको छ भने कास्की जिल्ला रिभान ९ बस्ने ६० वर्षिया डिल कुमारी बुढाथोकी र पर्वत धाईरिङ्ग ८ बस्ने वर्ष ६० की हरिमाया पुनको म्याग्दी जिल्ला अस्पतालमा उपचारको क्रममा मृत्यू भएको पर्वतका प्रहरी नायव उपरिक्षक शेखर खनालले जानकारी दिनुभयो ।
दुर्घटनामा परी गम्भिर घाइते हुने रिभान ९ की १४ वर्षीय अमृता पुन, रिभान ९ कै २१ वर्षीय लुकमाया बुढाथोकी, ४ वर्षीय निरज बुढाथोकी र २ वर्षीय निश्चल बुढाथोकीलाई थप उपचारका लागि पोखरा रिफर गरिएको जिल्ला प्रहरी कार्यालय पर्वतले जनाएको छ । त्यसैगरी सालिजा ९ का २० वर्षीय शिव पाईजा, धाइरिङ ८ की ९ वर्षीय पुजा परियार, ६० वर्षीय ढिके दर्जी , लुकमाया वि.क. र प्रकाश परियारको म्याग्दी अस्पतालमा उपचार भईरहेको छ ।
सवारी चालक रिम बहादुर फगामीलाई नियन्त्रणमा लिइएको बताईएको छ । ओरालो बाटोमा ब्रेक फेल भएर झण्डै ६० मिटर तल जीप खसेको हो । कच्ची सडकमा जिपको ब्रेक फेल भएर दुर्घटना भएको हुनसक्ने प्रहरीको अनुमान रहेको छ ।
दुर्घटनाका तस्विर पनि छन् ।
