प्रताप बानियाँ
वैशाख–२२, म्याग्दी ।
म्याग्दी जिल्लाको पुलाचौर गाविसका महिलाहरुले तालिम हलमा नै अगरबत्तीको निर्माण गरेका छन् । महिला तथा बालबालिका कार्यालय म्याग्दीको आयोजनामा गत बुधबारदेखि बेनीमा सञ्चालित महिलाहरुलाई अगरबत्ती बनाउने जिल्लास्तरीय तालिमको अवधिमा उनीहरुले दुईसय २८ प्याकेट अगरबत्ती बनाएका हुन् ।
महिलाहरुको सीप विकास गरी आर्थिक रुपमा सक्षम र लघुउद्यमी बनाउने उद्देश्यले सञ्चालित तालिममा प्रयोगात्मक अभ्यास गरी उनीहरुले अगरबत्ती बनाएका छन् । तालिममा अगरबत्ती बनाउने तरिका, विधि र आवश्यक सामग्रीका बारेमा म्याग्दीको बेगखोला–२ बेगकी अगरबत्ती महिला लघुउद्यमी सेमिता पुनले सहजीकरण गरेकी थिइन् ।
अगरबत्तीका लागि आवश्यक बाँस, कोइला, काउलो, तेल, सेन्ट, प्लाष्टिक र रङको प्रयोग गरी अगरबत्तीको निर्माणकार्य सम्पन्न गरिएको छ । दक्ष व्यक्तिले दिनमा १ हजार ६ सयवटा अगरबत्तीका काँटाहरु तयार गर्नसक्ने सहजकर्ता पुनको भनाइ छ ।
त्यस्तै उत्पादित अगरबत्तीको प्रतिकाँटा २० र दर्जनलाई दुईसय रुपैयाँसम्म पर्ने बताइएको । ५ दिनसम्म सञ्चालन भएको तालिममा पुलाचौर गाविसमा महिलाको क्षेत्रमा क्रियाशिल संस्था श्री जागृति महिला विकास बहुउद्देश्यीय सहकारी संस्थामा आबद्ध २० जना महिलाहरुको सक्रिय सहभागिता रहको थियो ।
तालिममा बोल्दै महिला विकास अधिकृत निर्मला शर्माले कार्यालयद्धारा अगरबत्ती निर्माणको तालिम पहिलोपटक सञ्चालन गरिएको बताइन् । उनले सिपमूलक तथा अन्य व्यावसायिक तालिम तथा कार्यक्रमहरु कार्यालयले सञ्चालन गर्दै आइरहेको जानकारी दिएकी छिन् । मुख्य महिला कार्यकर्ता लक्ष्मी केसीको संयोजनमा सम्पन्न तालिममा निर्माण गरिएका अगरबत्ती प्रति प्याकेट २० का दरले बिक्री गर्ने कार्यालयले जनाएको छ ।
