काठमाडौं, २३ बैशाख ।
निषेधाज्ञा कार्यान्वयन गर्न माइकिङ गर्दै हिँड्ने क्रममा बाँकेको नेपालगञ्‍जमा प्रहरीको गाडी तोडफोड भएको छ ।

स्थानीय प्रशासनले आज बिहान ११ बजेदेखि लागू गरेको निषेधाज्ञाबारे बजारमा माइकिङ गर्दै हिँडिरहेको प्रहरीको गाडीमा स्थानीय व्यापारीले ढुंगामुढा गरेका हुन् ।

रानीतलाउ क्षेत्रमा रहेको तरकारी बजार र नजिकैका पसलमा मानिसको भीड लागेपछि प्रहरीले हटाउन खोज्‍ने क्रममा विवाद भएको थियो ।

वडा प्रहरी कार्यालय नेपालगञ्‍जका इन्चार्ज प्रहरी निरीक्षक हरि बस्‍नेतका अनुसार स्थानीय एक व्यापारीले प्रहरीमाथि नै हात हालेपछि स्थिति तनावपूर्ण बनेको थियो ।

प्रहरीले ती व्यापारी रवि गुप्तालाई नियन्त्रणमा लिएपछि विवाद झन् बढेको हो। स्थानीय व्यापारीको ढुंगा प्रहारबाट प्रहरीको बा१ झ ८२८४ नम्बरको गाडीमा क्षति पुगेको छ ।

११ बजेदेखि निषेधाज्ञा लागू भएपछि बिहान केही समय प्रहरीले अत्यावश्यक सामग्री किन्‍नका लागि बजार खुल्न दिएको थियो ।

अहिले भने त्यहाँको स्थिति नियन्त्रणमा आइसकेको जिल्ला प्रहरी कार्यालय बाँकेले जनाएको छ ।

एक जवाफ छोड्न

Please enter your comment!
Please enter your name here