म्याग्दी, २९ माघ । बेनी नगरपालिका–३,भकिम्लीस्थित राखुका किसानले परम्परागत खेती लगाउन छाडेर व्यवसायिक सुन्तला खेती गर्न थालेका छन् । परम्परागत रुपमा लगाइने वर्षेबाली अन्तर्गतको मकै, कोदो, फापरलगायत खाद्यान्नको उत्पादन हुन छाडेपछि किसानहरु सुन्तला खेतीतर्फ आकर्षित भएका हुन्

परम्परागत खाद्यान्नबालीले जीवन निर्वाह गर्न समेत मुस्किल परेपछि किसान सुन्तलालाई व्यवसायिकता दिन थालेका हुन् । उनीहरुले खाद्यबालीको सट्टा व्यवसायिक रुपमा सुन्तलाजाते फलफुल खेती गरेर मनग्य आम्दानी गर्न थालेका छन् ।

उपल्लो र तल्लो राखुका करिब ६५ घरधुरी किसान व्यवसायिक रुपमा सुन्तला जातको फलपूmल खेतीतर्फ कम्मर कसेर लागेको स्थानीय मनकुमारी पुनले बताईन् । ‘महिलाको आम्दानीको स्रोत नै सुन्तला भएको छ, हामीलाई धेरै सहज भएको छ,’ उनले भनिन् । अनुकुल समयमा एकजना किसानले वर्षमा सुन्तला बिक्री गरेर झण्डै पाँचलाख रुपैयाँको हाराहारीमा आम्दानी गर्ने गरेका छन् । भकिम्लीका किसानले सुन्तला उत्पादन कृषक समूह बनाएर सामुहिक रुपमा अगाडि बढेका छन् भने वर्षेनी सुन्तला खेती फस्टाउँदै जान थालेको छ ।

राखुका किसानलाई व्यवसायिक सुन्तला खेतीतर्फ आकर्षित गर्नका लागि तत्कालीन जिल्ला कृषि विकास कार्यालयले अनुदानमा सुन्तलाका बिरुवा तथा मलबिउको सहयोग, नर्सरी स्थापना र सुन्तला सुदृढीकरण कार्यक्रम सञ्चालन गरेको थियो । स्थानीय जातको सुन्तला खेती गर्दै आएका राखुका किसानले गाउँकै नर्सरीबाट सुन्तलाका बिरुवा लगेर अन्य बगैंचा समेत निर्माण गरेका छन् ।

यहाँका किसानको आम्दानीको मुख्य स्रोत नै व्यवसायिक सुन्तला खेती बनेको छ । राखु क्षेत्रका सबै घरमा सुन्तला खेती गरिएको छ । भकिम्लीको राखुसहित मरेक, डाँडाखानी, ज्यामिेरे लगायत स्थानमा पनि व्यावसायिक सुन्तला खेती गरिएको छ । थोरै लगानीमा गरेको सुन्तला खेतीले छोटो समयमा नै उत्पादन र राम्रो आम्दानी दिएपछि किसानको सुन्तला खेतीतर्फ आकर्षण बढ्दै गईरहेको वडा अध्यक्ष पदमबहादुर पुनले बताए । यसवर्ष सुन्तला बगैचामा फैलिएको औँसा किराको प्रकोपले गतवर्षको तुलनामा आधाभन्दा कम सुन्तला बिक्री भएको अध्यक्ष पुनले बताए ।

औँसाको प्रकोपले पाक्ने समयमा बोट पहेंलो भएका र सुन्तला झर्ने समस्याले गतबर्षको तुलनामा भकिम्लीमै करिब ५० लाख रुपैयाँ बराबरको उत्पादन घटेको छ । म्याग्दी जिल्लाको समुन्द्री सतहबाट १ हजार २ सय मिटरदेखि १ हजार ६ सय मिटरको उचाइसम्म सुन्तला खेती हुँदै आएको छ । विरुवा रोपेको ६÷७ वर्षमै सुन्तलाले उत्पादन दिने कृषि ज्ञान केन्द्र म्याग्दीले जनाएको छ । कार्यालयबाट सुन्तला बगैंचा तथा कृषकलाई अनुदान र नर्सरी स्थापनामा सहयोग गरिएको छ ।

जिल्लाका ६ वटै स्थानीय तहको ७ सय १० हेक्टर जमिनमा सुन्तला खेती भइरहेकोमा यसवर्ष २ सय ८० हेक्टरबाट २ हजार ३१० मेट्रिक टन सुन्तला उत्पादन हुन्छ । पकेट क्षेत्रमा बगैचा विस्तार, सुधार, पुराना बोट बोट काटछाट, सुन्तला ढुवानी गर्ने कार्टुनमा अनुदानका गतिविधिमा किसानकोे माग अनुसार सम्बन्धित निकायबाट भने सहयोग हुन नसकेको किसानको गुनासो छ । जिल्लामा बार्षिक १० करोड रुपैयाँ हाराहारी मूल्यकोमा सुन्तला विक्री हुने अनुमान गरिएको कृषि केन्द्रले जनाएको छ ।

एक जवाफ छोड्न

Please enter your comment!
Please enter your name here