
काठमाडौं, १५ मंसिर । नेपाल उद्योग वाणिज्य महासङ्घका नवनिर्वाचित पदाधिकारीले कार्यभार सम्हालेका छन् ।
वैधानिक प्रावधानअनुरूप महासङ्घको अध्यक्ष बनेका शेखर गोल्छा, शनिबार सम्पन्न निर्वाचनबाट वरिष्ठ उपाध्यक्षमा निर्वाचित व्यवसायी चन्द्रप्रसाद ढकाल, वस्तुगत समूहका उपाध्यक्ष अञ्जन श्रेष्ठ, एसोसिएट समूहका उपाध्यक्ष रामचन्द्र सङ्घई र जिल्ला नगर उपाध्यक्ष दिनेश श्रेष्ठ र कार्यकारी सदस्यहरूले आइतबार पद तथा गोपनीयताको शपथ लिएका छन् ।
यसअघि वरिष्ठ उपाध्यक्ष रहेका शेखर गोल्छाले महासङ्घको १९औँ अध्यक्षको पद तथा गोपनीयताको शपथ ग्रहण गरेका थिए । महासङ्घको विधानअनुसार वरिष्ठ उपाध्यक्षको कार्यकालपछि स्वतः अध्यक्ष हुने प्रावधानअनुरूप उनले अध्यक्षता ग्रहण गरेका हुन् ।
आइतबार बिहान सार्वजनिक भएको मतगणना अनुसार वरिष्ठ उपाध्यक्षमा निर्वाचित ढकालले करिब ५५ प्रतिशत र प्रतिद्वन्द्वी किशोर प्रधानले करिब ४५ प्रतिशत मत पाएका थिए ।
निर्वाचनका क्रममा समूह बनाएरै प्रतिस्पर्धामा उत्रिएका भए पनि परिणाम भने मिश्रित आएको छ । वरिष्ठ उपाध्यक्षमा ढकाल विजयी हुँदा उनको प्यानलबाट एसोसिएट उपाध्यक्ष सङ्घई मात्र विजयी भनेभने वस्तुगत र उद्योग वाणिज्य समूहबाट प्रधान विजयी भने। कार्यकारी सदस्यमा पनि दुवै प्यानलबाट मिश्रित रूपमा विजयी भएका छन् ।
जिल्ला नगर उपाध्यक्ष दिनेश श्रेष्ठले ५८ मत प्राप्त गरे भने प्रतिस्पर्धी गुणनिधि तिवारीले ४७ मत पाए । दुवै किशोरकुमार प्रधान समूहबाट चुनावीमा उत्रनुभएको थियो । दिनेश श्रेष्ठ महासङ्घमा वस्तुगतबाट उपाध्यक्ष भइसकेका छन् ।
वस्तुगत समूह उपाध्यक्ष अञ्जन श्रेष्ठ ६१ मत र प्रतिद्वन्द्वी उमेशलाल श्रेष्ठले ३७ मत पाए । उमेशलाल वर्तमान कार्यसमितिमा वस्तुगतर्तफ उपाध्यक्ष नै थिए भने अञ्जन वस्तुगत समूह सदस्य थिए । एसोसिएट उपाध्यक्ष बनेका सङ्घईले ४५५ मत ल्याए भने प्रतिद्वन्द्वी सौरभ ज्योतिले ४३४ मत ल्याएका थिए ।
उनहरूले महासङ्घको निर्वाचनका क्रममा समूह बनाएर गएको भए पनि अबका दिनमा त्यसको कुनै प्रभाव नदेखिने गरी एकताबद्ध भएर काम गर्ने प्रतिबद्धता जनाएका छन् । अध्यक्ष बनेका गोल्छाले प्रधान समूहलाई खुलेर समर्थन गर्दै आएको थियो तर वरिष्ठ उपाध्यक्षमा ढकाल निर्वाचित भने। ढकालले समूहका कुरा निर्वाचनकै दिनबाट अन्त्य भएको र त्यसको कुनै असर नरहने प्रतिक्रिया दिए । गोल्छा हाम्रो अध्यक्ष हुन्, उनले भने, “अब प्यानलको कुनै पनि प्रभा भोलिका दिनमा रहँदैन । ”
शपथ समारोहलाई सम्बोधन गर्दै निवर्तमान अध्यक्ष भवानी राणाले महासङ्घको ५० वर्षे इतिहासमा महिला अध्यक्ष हुने इतिहास लेख्न पाएकामा गर्व गरे । उनले आफ्नो कार्यकाल सफलतापूर्वक सम्पन्न भएको भन्दै त्यसको श्रेय सामूहिक भाव र सबै पदाधिकारीको सहयोग रहेको बताए ।
नवनियुक्त अध्यक्ष शेखर गोल्छाले महासङ्घलाई मन्दिरका रूपमा व्याख्या गर्दै यसको जिम्मेवारी र भूमिका प्रभावकारी बनाउन दत्तचित्त भएर लाग्ने प्रतिबद्धता जनाए । महासङ्घलाई गुट–उपगुटजस्ता राजनीतिबाट मुक्त गरेर व्यावसायिक तथा संस्थागत प्रतिष्ठा विस्तारमा लाग्ने उनले बताए । गोरखापत्र दैनिकमा खबर छ ।
