दादले धेरैलाई सताएकै हुन्छ । सही समयमा सही उपचार नपाएमा सामान्य लाग्ने दादले पनि धेरै समस्या दिन सक्छ । यसलाई बेवास्ता गर्दा एकपटक निको भइसकेको दाद पनि पटक–पटक आउन सक्छ । पहिलेकै जस्तो तापक्रम र वातावरण मिल्यो भने बढी दोहोरिने सम्भावना हुन्छ । साथै, चिकित्सकले दिएको औषधि तोकिएको समयअगावै छोडे पनि पुनः दोहोरिने सम्भावना हुन्छ । दादको औषधि लगाउने र खाने अवधि कम्तीमा पनि एक महिना हुन्छ । फंगल्स शरीरको जुन सतहमा हुन्छ, त्यो निख्रिन वा बाहिरिन शरीरले त्यति समय लगाउँछ ।
कसरी बच्ने ?
- पसिनालाई शरीरमा ओभाउन नदिने ।
- कटनका लुगा लगाउने ।
- शरीरमा हावा छिर्ने खुला कपडा लगाउने ।
- शरीरमा फोहोर हुन नदिने ।
- सामूहिक पौडीपोखरीमा नजाने ।
- एक–अर्काको कपडा साटेर नलगाउने ।
को बढी जोखिममा ?
- रोगप्रतिरोधी क्षमता कमी भएका व्यक्ति ।
- मधुमेह भएका, दीर्घरोग भएका, रोगप्रतिरोधी क्षमता कम बनाउने औषधि खाइरहेका ।
- सार्वजनिक पोखरीमा बढी पौडी खेल्ने व्यक्ति ।
- एक–आपसमा लुगा साटासाट गरेर लगाउँदा पनि सर्छ ।
लक्षण
- चिलाउने ।
- सानो पैसा आकारको दाग देखिने ।
- फैलिँदै जाने ।
- बीच भागमा राम्रो भएजस्तो देखिन्छ, तर बाहिर रातो बढ्दै जान्छ ।
- खराब औषधि भएमा घाउ पाकेर पिप आउने हुन्छ । त्यसका साथै बढ्ने प्रक्रिया तीव्र हुन्छ । चह¥याएर हिँडडुल गर्न नसक्ने अवस्थामा पुग्छ ।
- कपालको फंगल्स विद्यालय जाने बालबालिकामा बढी हुन्छ ।
रोकथाम तथा उपचार
- औषधि नमिसाइएको सादा साबुनले नुहाउने ।
- नुहाएपछि कटनको कपडाले राम्रोसँग पुछेर सुक्खा बनाउने ।
- चिकित्सकको सल्लाहमा मात्र औषधि प्रयोग गर्ने ।
- ढुसी मार्न प्रयोग गरिने पाउडर प्रयोग गर्ने ।
- बाह्य संक्रमण नजुधोस् भनेर सचेत रहने ।
- आफूखुसी उपचार नगर्ने ।
- चिकित्सकलाई भेट्नुअगावै जथाभावी औषधि प्रयोग गर्दा सामान्य किसिमको फंगल्सको संक्रमणमा पनि लामो समय औषधि खानुपर्ने हुन्छ ।
नयाँ पत्रिकाबाट
